我好開心啊，隻HDD救返！（超長的故事）～～

 話說，７月果時，我部電腦死o左一隻 250G 的 HDD～～
裏面有我由 199x 至依家的相，仲有網站！
於是我即刻搵 data recovery 公司救～～

初初係去旺角搵o左第１間好 "up dup" 的公司，
佢話若果救得倒，要幾千蚊，我要落 $200 訂先！
點知果晚我放低隻 HDD 之後，諗諗o下又驚信唔過，轉頭走去拎返！
因為我之前上網搵過一D大型的 data recovery 公司的資料，
覺得果Ｄ國際性公司比較可靠，諗諗o下決定不如拎去果Ｄ整！
要知道，救 HDD 一旦救唔倒，整壞埋，就冇o架啦～～
但佢話果 $200 訂冇得退，只可以作日後消費用！

跟住落o黎輾轉經過幾個月，我搵o左５間公司！

第２間公司，係一間國際性好知名的 data recovery 公司！
佢o地免費 check 過後，一星期內已覆我話救唔倒！
佢話可以俾 $1000 買隻同樣的 HDD 拆Ｄ parts 幫我換再試，
但純綷係試，唔擔保一定得，因為我唔想佢拆開我 HDD
（因為拆親就冇o架啦），結果我話唔好，去拎返走，不需收費！

第３間係一間新俊的韓國 data recovery 公司，佢o地好有心機，
花了個幾月幫我研究，但可惜都整唔倒，又係去拎番，冇收費！

第４間係另一間知名的美國 data recovery 公司，
佢響香港幫我個 HDD 做個初步評估，話隻 HDD 佢o地香港分部救唔倒，
問我 send 唔 send 過美國總公司試，話運費要 $9xx～～
我見唔係太貴，又諗美國果邊技術應該好Ｄ，於是答應！
可惜後來，佢o地都係通知返我話連美國果邊都救唔倒，叫我去拎番！

響這段期間，一間一間公司話救唔倒，我已經愈來愈 down，覺得機會好渺亡！
搞搞o下，已過了幾個月，不單費o左好多心力搵咁多間公司，頻頻撲撲，仲完全冇起色！



由於我見第１間落了 $200 訂，諗住果時拎走o左，不如拎去試番～～

點知我去到旺角，見到另一間公司的宣傳海報，於是又拿了去另一間試！
呢間係第５間公司，要俾 $120 檢查費，放低個 HDD 幾日之後，
佢o地居然話救得返百幾 GB 資料，叫我去睇！我好開心第一次有公司話救得倒Ｄ o野出o黎！
我去睇，係見得返好多 files 同 folder，但係其實好多都係 corrupted！
好多相／movie都開唔返！只係得小部份 text file 開得返！結果佢原本話要 $1800，
但因為好多救出來的o野都係冇用，所以結果只收我 $300，當人工費！

好啦，到左前幾日，我始終唔放棄，將個壞 HDD 拿番去最初第１果間 "Up Dup" 公司整。。


估唔到過o左一兩日，佢已經話救得返Ｄ data！我問佢救出o黎果D係咪真係完整的？
Ｄ相開唔開倒？佢話ＯＫ！仲叫我拎個 HDD 去抄番救出來的資料！
結果我噚日去拎，真係救倒！好開心好開心！全部Ｄ相同網頁都響番度！
抵俾佢賺果幾千蚊！真係估唔到竟然係我第一次拎去果間公司，竟然先幫我救倒！
早知當初就唔好拎走，由得佢救啦！

呢個故事教訓我o地，有時Ｄ o野冥冥中就係咁！
同埋未必國際大公司就掂，細的 "Up Dup" 舖仔可能藏龍伏虎！
不過其實我都唔 sure，最終佢o地救倒，會唔會同我拎過去咁多間公司有關？
會唔會因為中間一Ｄ公司整過Ｄ o野，所以最終夾夾埋埋先得？
同埋會唔會不同公司對於不同死法的 HDD，會有不同程度的 recovery 能力呢？

Anyway, 經過差不多成半年，依家個 HDD 終於救得返，好神奇亦好開心！
證明只要有恆心，唔好放棄，一定仲有機會的！同埋真係要加倍做好 backup 工作！
大家萬一若遇到類似情況，我可以俾意見大家，同埋最重要係記住：
過程中千祈唔好俾人拆開隻 HDD，一日未拆，一日都仲有機會！